33歲胖虎拒絕離開曼聯　等踢世界盃

33歲卡斯米路拒絕離開曼聯(Getty Images)

受巴西新任主帥安察洛堤影響，曼聯33歲巴西中場卡斯米路已決定，合約尚餘1年情況下續留在曼聯，主要目標係準備為巴西參加明年北美世界盃，一直努力削減人工開支嘅拉特克利夫，算盤又打唔響。

安察洛堤早前成為巴西主帥，立即重召卡斯米路並予以重用，英國傳媒報道，安帥表明，如果卡斯米路轉投沙特豪門，就唔會再選佢參加明年世界盃，直接令「胖虎」打消去沙特念頭，決定留喺曼聯。

卡斯米路一直係曼聯班主拉特克利夫嘅「眼中釘」，主要係佢享有全隊最高薪嘅35萬鎊周薪，令「拉爵」瘦身大計停滯不前，為咗趕走卡斯米路，拉特克利夫講咗唔少難聽說話，例如話佢係「失敗收購」，不過卡斯米路無視呢類「嘴炮」，決定留隊。

卡斯米路上季尾狀態復甦，成為5大聯賽鏟波王，表現深受主帥魯賓艾摩廉認同，佢同曼聯合約至2026年夏天屆滿，好大機會喺曼聯踢到約滿。